Мин Кузьмина Надежда Михайловна диэммин, 07.12.1978 сыллаахха Усть — Алдан оройуонун Тулуна бөһүөлэгэр Васильевтар дьиэ кэргэннэригэр иккис оҕонон күн сирин көрбүтүм. Бииргэ төрөөбүттэр биэспит: түөрт кыыс уонна биир уол . Аҕам уонна аҕам ийэтэ Атаксия ыарыытынан ыалдьар этилэр.
Оскуоланы бүтэрэн баран Медколледжка медсестра үөрэҕэр киирбитим. 2000 сыллаахха ЯГКБ үлэлээн саҕалаабытым. 2001 сылга ыал буолбутум. Кэргэним Кузьмин Трофим Григорьевич Өлүөхүмэттэн төрүттээх, идэтинэн сварщик. Икки уол оҕолоохпут, Дьокуускай куоракка олоробут. Улахан уолбут Кузьмин Максим ХИФУ студена, кыра уол Кузьмин Станислав 8 кылааһы бүтэрдэ . Чааһынай дьиэҕэ олоробут, оҕуруот олордобут, ыттаахпыт, куоскалаахпыт. Чааһынай дьиэҕэ олорорбутун сөбүлүүбүт, уолаттар аҕаларыгар көмөлөһөллөр, миэхэ дьиэ үлэтигэр эмиэ көмө буолаллар. Ыалынан бары бииргэ сылдьарбытын сөбүлүүбүт, аймахтары кытары эмиэ бииргэ мустабыт. Кэргэним уонна оҕолорум миигин өйдүүллэр, өйүүллэр. 24 сыл биир сиргэ үлэлээтим, быйыл үлэлээн бүттүм.
2018 сылтан инвалидностаахпын, сыл аайы стационарга киирэн эмтэнэбин. Ыарыым быйыл ордук биллэрдэ.
Билигин кыахтаах эрдэхпинэ диэн онно — манна сылдьа сатыыбын. Ол курдук үлэбинэн проезд туһанан кэргэммин, оҕолорбун кытта күүлэйдээн кэллибит. Россиябыт араас куораттарынан биэс сиргэ сылдьан наһаа үчүгэйдик сири- дойдуну көрдүбүт, сынньанныбыт.
Кэлэн баран төрөөбүт дойдубар эдьиийбин, балтыбын уонна кэргэммин кытары сир астаатым, бары астына- дуоһуйа сынньанныбыт. Оҕо сылдьан улааппыт сайылыкпытыгар сылдьан астынным. Төрөөбүт дойдубуттан күүс — сэниэ ылабын, дууһалыын сынньанабын. Киһиэхэ туохтааҕар да күндү- төрөөбүт дойдута ! Куоракка кэлэн баран дьиэ кэргэммин кытта бары бииргэ мустан сөтүөлээтибит. Хас күммүн үчүгэйдик атаара сатыыбын, чугас дьонум өйөбүлэ наһаа наадалаах , бэйэҕиттэн эмиэ барыта тутулуктаах. Биһиги эмтэммэт ыарыыга бэриммэккэ бэйэбитин көрүнүөхтээхпит, сөпкө аһыахтаахпыт, гимнастиканы хас күн аайы оҥоруохтаахпыт. Сылга иккитэ ЯНЦ КМП клиникаҕа суруйтаран киирэн сытар эмиэ наада, онно Атаксия ыарыыны билэр, үөрэтэр, биһиэхэ көмөлөһөр специалистар бааллара улахан өйөбүл.
Иллэҥ бириэмэбэр зонтик баайабын, уруһуйдуубун. Араас оҥоһуктары илиибинэн оҥорорбун сөбүлүүбүн.