Удьуорунан бэриллэр ыарыыны көрөр-истэр медицина комплекснай кыһалҕатын Дьокуускайдааҕы киинин эмчиттэрэ Нам улууһугар экспедицияларын салҕыыллар. Бу сырыыга улуус өрүс нөҥүө сытар нэһилиэктэригэр үлэлээтилэр.

Бүгүн, тохсунньу 17 күнүгэр, Иккис Хомустаахха тиийэн нэһилиэнньэни көрдүлэр-иһиттилэр. Олохтоохтору невролог, ревматолог, генетик, лаборант быраастар чинчийдилэр. Доруобуйаҕа ханнык уоргаҥҥа хааччах баарын быһаарар биохимия уонна ДНК аналиһын ылан лабораторияларыгар илдьэ бардылар. Түмүгэ ый курдугунан биллэр.

Маны таһынан сахаҕа бокоорор эбэтэр салҕа диэнинэн биллэр, ньиэрбэ кэхтиитин ыарыыларын туһунан дьоҥҥо өйдөнүмтүө уонна тиийимтиэ гына киэҥ ис хоһоонноох лекциялары ыыталлар, быһалаан-сүбэлээн биэрэллэр.

Генетическэй ыарыылары үөрэтэр киин быраастарын кытта улуустааҕы киин балыыһа кылаабынай бырааһа Ариан Сергеев нэһилиэнньэни кытта тус көрсөн кэпсэттэ. Олохтоохтор быраастар маннык кэлэн көрөн баралларын олус астыннылар, махтаннылар.

«Нам улууһа» МТ пресс-сулууспата